||श्री||
मागील लेख :- मकर संक्रमण २०२२ – नाशिक
दिल्ली टू गोवा
पाच राज्यात विधानसभेच्या निवडणुका आहेत. त्यातील एक गोवा राज्य जे महाराष्ट्राला जवळचे आहे. भारतातील सर्वात छोटे राज्य १९/१२/१९६१ ला गोवा पोर्तुगीजांच्या जोखडातून मुक्त झाले. त्या वेळी गोवा, दमन, दिव हे एकत्रित केंद्रशासित प्रदेश होता. ३० मे १९८७ ला विभाजन होऊन गोवा भारताचे २५ वे राज्य झाले. गोवा विधानसभेच्या ४० जागा आहेत. २१ जागांचे बहुमत असणे आवश्यक आहे. १४ फेब्रुवारी २०२२ ला एकाच टप्यात मतदान होईल तर १० मार्च २०२२ ला मतमोजणी होईल. भाजपा, गोवा फॉरवर्ड पार्टी, महाराष्ट्रवादी गोमंतक पक्ष, शिवसेना, कॉग्रेस, आप, तृणमुल, राष्ट्रवादी इ. प्रमुख पक्ष गोव्यात आहेत. गेली दहा वर्षे गोव्यात भाजपा चे सरकार आहे. २०१७ मध्ये भाजपाने गोवा फॉरवर्ड पार्टी, महाराष्ट्रवादी गोमंतक पक्ष व अपक्ष यांच्या सहाय्याने सरकार बनवले. मुख्यमंत्री श्री.मनोहर पर्रीकर यांच्या मृत्यू नंतर मार्च २०१९ मध्ये डॉ. प्रमोद सावंत मुख्यमंत्री पदी विराजमान झाले व विश्वास दर्शक ठराव २० विरुद्ध १३ अस्या मतांनी जिंकले.
१९ डिसेंबर हा गोवा मुक्ती दिन तर ३० मे गोवा राज्य दिन आहेत. सध्याचे गोवा राज्य हे ३०/०५/१९८७ ला अस्तित्वात आल्याने त्या कुंडलीचा विचार करू. पणजी हि गोव्याची राजधानी असली तरी विधानभवन हे पणजीच्या बाहेर आहे. ते प्रथम पासूनच तेथे आहे कि नंतर तेथे गेले हे माहित नाही. पण कुंडलीचा विचार करतांना हेच स्थानांश घेत आहे. 15°30'39.1"N, 73°50'12.3"E मकर लग्न २७°/५९’/२९” वर असून चंद्र मिथुनेत ०८°/०५’/४२” वर होता.
आप व भाजपा वगळता इतर पक्षांनी आजून तरी (२७/१/२०२२ पर्यंत) आपला मुख्यमंत्री पदाचा चेहरा जाहीर केलेला नाही. २७/०१/२०२२ रोजी जी प्रश्न कुंडली घेतली ती सिंह लग्नाची आहे, म्हणजे प्रश्न लग्न हे गोव्याच्या कुंडलीत अष्टमात पडले आहे. त्यामुळे हि निवडणूक गोव्यात तणाव निर्माण करेल. चंद्र चतुर्थात केतू युतीत आहे तर दशमात केवळ राहू आहे. चंद्र चतुर्थात असल्याने सामान्य जनतेचा कल विरोधी पक्षा कडे असेल. शनीच्या नक्षत्रातील नीच चंद्राची दशमावर दृष्टी हि विद्यमान सत्तारूढ पक्षाला हानी कारक आहे. त्यात दशमेश शुक्र पंचमात वक्री स्वस्थाना पासून अष्टमात पडल्याने भाजपाला नुकसान होण्याचा संभव असेल. शुक्र चतुर्थेश मंगळ युक्त असल्याने भाजपातील बंडाळीचा विरोधकांना फायदा होण्याचा संभव असेल.
१०/०३/२०२२ ला मतमोजणी आहे. या दिवशीही शुक्र मंगळ युती आहे पण लग्नात आहे. येथे शुक्र सुधारला आहे. या वेळी गोव्यात नवे समीकरण पुढे येवू शकते. विद्यमान सत्तारूढ व विरोधी यांच्यातील काही घटक एकत्र येवून सत्ता स्थापन करू शकतात. आप चा मुख्यमंत्री होण्याची शक्यता अधिक आहे. भाजपा, गोवा फॉरवर्ड पार्टी, महाराष्ट्रवादी गोमंतक पक्ष या पैकीशी ‘आप’ निवडणूकोत्तर आघाडी करून सत्तेत येवू शकते किंवा चतुर्थातील हर्षल व उच्चीचा मंगळ या मुळे अनपेक्षितपणे, धक्कादायकरीत्या जोरदार प्रदर्शन करीत ‘आप’ स्वबळावरही सत्तेत येवू शकते.
